Delhi ki thandi raat thi. Sheher ki bheed aur traffic ke shor ke beech ek chhota sa rented flat tha, jahan Aditya Jain name ka ladka apne laptop ki screen par nazar tikaye baitha tha. Kamra halka sa thanda tha, aur chai ka cup ab kab ka khaali ho chuka tha.

Rajasthan se aaya tha woh. Sapne bade the, isliye ghar chhod diya tha.

Par ab sapne poore hone se zyada, doori zyada mehsoos hoti thi — ghar se, apno se, aur apni hi pehchaan se.

Kabhi-kabhi raat ko balcony mein khade hoke woh bas yahi sochta tha…

Kya sapne sach mein itne mehange hote hain?

Us raat bhi wohi silence tha. Bas city ki door se aati horns ki awaaz.

Aditya ne bina kisi reason ke phone uthaya aur Telegram khol diya —

“Law & CS Aspirants.”

Shayad aadat thi… ya phir us khamoshi se bachne ka ek chhota sa tareeka.

Dusri taraf, Gujarat mein…

Siya Rathore library ke ek kone mein baithi thi. Table par books ka ek chhota sa stack tha aur haath mein pen, jo continuously notes bana raha tha.

LLB aur CS — dono ek saath. Din ka har minute kisi na kisi deadline ke naam tha.

Usne thodi der ke liye aankhein band ki, phir bina soche phone uthaya aur group open kiya.

Ek student ka doubt padha gaya tha.

Siya ne calmly type kiya —

“Section ka concept thoda different hai… agar chaho toh main short mein samjha deti hoon.”

Send.

Delhi mein Aditya ne woh message dekha. Wahi doubt tha jo uske dimag mein atka hua tha.

Thoda hesitate karke usne reply kiya —

“Can you explain it? Thoda confusion ho raha hai.”

Seconds guzre.

“Sure 🙂”

Bas.

Ek random sa doubt…

Ek normal sa reply…

Aur us raat, bina jaane, ek aisi conversation shuru ho chuki thi jo dono ki zindagi ka direction badalne wali thi.

Un dono ko abhi tak nahi pata tha ki yahi ek message unki life ki story ka sabse important beginning banne wala hai

Kabhi kabhi na…

shuruaat koi plan nahi hoti.

Bas

ek random sa message hota hai.